Sveçla zbulon emrat e dilerëve të drogës, kishin foto me zyrtarë të lartë serbë dhe sulmonin Policinë e Kosovës

Ministri i Punëve të Brendshme, Xhelal Sveçla, ka zbuluar identitetet e pronarëve të laboratorëve të drogës në veri. Ai thotë se vetëm brenda 24 orëve të fundit, u zbuluan 8 laboratorë, ndërsa zbuloi se disa dilerë kanë foto me zyrtarë serbë të cilat ai u publikoi në rrjetin social Twitter.

“Të dielën Lista Srpska dhe Petkoviq janë acaruar nga disa reagime. Çështja është e thjeshtë: me laboratorët, trafikantët e drogës dhe kriminelët që përdoren si mjete politike, fasada false nuk zgjat më shumë se deri në aksionin e radhës të policisë. Tetë laboratorë droge u zbuluan brenda 24 muajve dhe vetëm sot u gjetën tre laboratorë droge. Pronarët e tyre, Miljan Deleviq, Ivan Slaviq, Dushan Slaviq dhe Nikola Filgjokic, ishin të gjithë të përfshirë në sulmet ndaj Policisë së Kosovës”, shkruan Sveçla.

Svecla po ashtu tha se këta persona ishin të përfshirë në sulmet ndaj zyrtarëve të Policisë së Kosovës në veri gjatë muajve të fundit.

“Ata vendosin barrikada dhe frikësojnë qytetarët serbë që refuzuan të bashkëpunojnë me ta. Pas këtyre sulmeve, ata u vizituan nga ministri i Mbrojtjes, Millosh Vuçeviq dhe Petkovic, ndërsa u mbështetën dhe mbroheshin nga Vuçiq, Lista Srpska dhe Milan Radojcic. Ministrat serbë të përfshirë në këto instrumentalizime me bandat kriminale do të donin që këto foto dhe video të mos ekzistonin, por e kanë dhe japin prova të forta se çfarë fshihet pas të ashtuquajturës “politikë” të tyre”, përfundoi ai.