Është pjesë e “Grupit të Tiranës”, por ka një “rëndësi” të madhe për komplet funksionimin e Lëvizjes Vetëvendosje. Antarja e VV-së, Dejona Mihali u tha se kontrollon këtë subjekt politik. Këtë e deklaroi deputeti, Haki Abazi sot.
“Zonja Mihali nuk ka qenë pjesë e votimeve, nuk ka qenë pjesë e listës së deputetëve, nuk ka qenë në garën e brendshme për zgjedhjet brenda Lëvizjes Vetëvendosje, por, është njeriu kryesor që kontrollon dhe menaxhon me grupin parlamentar dhe vendimmarrjet që bëhen aty”, u shpreh Abazi sot.
Në lidhje me këtë, Insajderi ka kontaktuar me disa nga deputetët e Lëvizjes Vetëvendosje.
Deputeti Gramos Agusholli, tha për Insajderin se personalisht nuk kontrollohet nga askush dhe është i pavarur në vendimet që merr.
“Personalisht nuk kontrollohna nga askush, jam i pavarur ne vendime”, tha Agusholli për Insajderin.
I njëjti tha se shkon në qëndrime të partisë kur ato janë qëndrime që përputhen me parimet e tij.
“Ne shumicën e rasteve shkoj sipas qëndrimit të partisë kur ato janë qëndrime që përputhen me parimet e mia”, tha ai për Insajderin.
Në anën tjetër, deputeti i VV-së, Eman Rrahmani tha se refuzon ta komentojë deklaratën e Abazit, megjithatë sipas tij kush është i kontrollueshëm kontrollohet.
“Nuk do ta komentoja deklaratën e deputetit. Megjithatë kushdo që është i kontrollueshëm kontrollohet kështu funksionon kjo”, tha ai për Insajderin.
Kurse deputeti Fitim Uka, tha se nuk dëshiron ta komentojë deklaratën e deputetit Abazi fare.
“Nuk dua ta konentoj deklaratën e deputetit”, tha shkurt Uka për Insajderin.
I kontaktuar ka qenë edhe deputeti i VV-së, Visar Korenica por deri më tani nuk ka kthyer përgjigje.
Insajderi ka dërguar pyetje edhe tek deputetja Saranda Bogujevci, por, as ajo nuk është përgjigjur deri tani./Gazeta Insajderi
