Sipas raportimeve të fundit, brenda strukturave të Lidhjes Demokratike të Kosovës (LDK) po qarkullon një “skicë” e listës zgjedhore, e cila lidhet me një afrim të mundshëm politik mes kryetarit të partisë, Lumir Abdixhiku, dhe presidentes Vjosa Osmani.
Burimet bëjnë të ditur se kjo skicë parasheh që në krye të listës zgjedhore të renditet Vjosa Osmani, e ndjekur nga Lumir Abdixhiku në pozitën e dytë. Në përbërjen e dhjetë kandidatëve të parë, Osmani do të kishte mundësinë të përzgjedhë tre kandidatë, ndërsa Abdixhiku pesë.
Ndërkohë, në dhjetëshen e dytë, raporti i përfaqësimit ndryshon në favor të Osmanit, e cila do të kishte gjashtë pozita, krahasuar me katër që do t’i takonin Abdixhikut.
Këto zhvillime vijnë në një kohë kur në skenën politike në vend po diskutohen mundësi të reja bashkëpunimi dhe rikonfigurimi të aleancave, megjithatë deri më tani nuk ka konfirmim zyrtar nga asnjëra palë lidhur me këto raportime.
